Arquivo por autores: acgbcn

Luz Fandiño

Convocatoria de Entrega do I Premio das Letras Galegas Vivas

Día, hora e lugar: sábado 11 de febreiro de 2023, 11.00 h., Ateneu Roig, Torrent d’en Vidalet, 32, Barcelona.

Convocatoria: entrega do I Premio das Letras Galegas Vivas a Luz Fandiño e proxección do documental “A poeta analfabeta” sobre a súa traxectoria cultural eactivista.

O próximo sábado terá lugar na nosa sede a proxección do documental “A poeta analfabeta” sobre a vida e obra de Luz Fandiño.

Acto seguido haberá unha conexión telemática e terá lugar un debate con ela.

Finalmente faráselle entrega do I Premio das Letras Galegas Vivas. Tamén haberá una recolleita de sinaturas para pedir á Real Academia Galego o establecemento dun premio que se outorgue a unha escritora ou escritor en lingua galega que estea vivo.

O acto está organizado pola Biblioteca Sabela Labraña, pertencente á Asemblea Cultural Galega de Barcelona (ACGB), que se dedica ao fomento da lectura mediante o Club de Lectura en lingua galega, e a organizar actividades culturais en torno da lingua ou cultura galega.

Xaneiro na biblioteca

A Biblioteca Sabela Labraña comeza o ano con forza. Para este mes de xaneiro, hai dous actos programados e os dous en colaboración con outras entidades.

Para o 25 de xaneiro, ás 18:30 na Biblioteca Mercè Rodoreda do barrio do Guinardó (Carrer de les Camèlies, 76 de Barcelona), Xoán Rubia, en concerto, amenizará a presentación do seu libro “Pasaba por alí (e quedei un intre)“. Teremos a Daniel Adzemian na guitarra. E na presentación, contaremos con Laura Duarte, Rosa Ollé, Anxo Baranga e Joan Prados.

Catro días despois, o domingo 29 de xaneiro, ás 12:00, no Ateneu Roig (Torrent de’n Vidalet, 34 de Barcelona), teremos presentación da escolma poética “O camiño das estrelas“. Haberá recital a cargo de Francesc Cornadó, Gustavo Vega, Josep Antón Soldevila, Mila Villanueva, Pura Salceda e Raida Rodríguez Mosquera. A presentación do libro estará a cargo de Laura Duarte, Anxo Baranga e Manuel Fortes.

Animádevos a gozar dun vermú poético!

Monográfico de bailes e músicas de Ourense con Artur Puga

Xentiña! O vindeiro 3 de decembro, @arturpuga achegarase até a ACGB para impartir un curso monográfico de baile e música tradicional do noroeste de Ourense. Haberá diferentes talleres ao longo do día. Pódeste apuntar a un só ou quedar a pasar a xornada enteira💙

Os cursos son abertos para todos os niveis, así que tanto se levas moito tempo no tradi coma se te queres iniciar, anímate, é a túa oportunidade😉

Ao mediodía temos organizado un xantar (17€) para repoñer forzas e comezar a tarde con enerxía. Ademais, haberá opción vexetariana 🌱. Apúntate para reservar a túa praza! 🍽

Ah! E o mellor de todo… para pechar a xornada e poñer en práctica o aprendido, remataremos cunha boa FOLIADA! 🥳

🗓 Sábado 3 de decembro do 2022   

📌 Lluïsos de Gràcia (Plaça del Nord, n7)  

📝 Inscricións neste formulario:  https://forms.gle/q6BpX7eKZE1cr2ha8 (ou nas nosas redes sociais).

Bulide… as prazas son limitadas!    

Os carteis son de @miriam.dida

A Festa do Roig

O 5 de novembro celebrarase a gran festa de celebración do Ateneu Roig na Plaça Joanic (LA FESTA DEL ROIG 2002). Haberá festa todo o día, con actividades de todos os xeitos organizadas por membrxs ou entidades do Ateneu Roig: teatro, música, narración oral… e, por descontado, haberá unha barra de bar autoxestionada, onde toda a xente poderá mollar a gorxa. 

Precisamos da túa participación, botando unha man na montaxe, na barra ou na desmontaxe, no que queiras. Non deixa de ser unha forma de vivir a festa desde dentro e de facer grupo. Ademais, se somos moitas as que nos apuntamos, menos esforzos e máis festiva será a experiencia.
Pódeste apuntar ás quendas facendo clic aquí.

No cartaz de aí enriba tes máis información da festa.

Aproveitamos para vos adiantar outra festa antes da do 5 de novembro, máis modesta pero terroríficamente encantadora no Ateneu Roig: o serán do 31 de outubro, para celebrar a noite de difuntos, ou a noite das meigas, de todos os santos, das ánimas, dos mortos, o samaín, samhain, a castañada, o magosto e, si, tamén, Halloween

Comezará ás 18:45 coa proxección da película “Tucker & Dale Vs. Evil”, unha divertidísima comedia que parodia os slashers rurais con moito truco. A partir das 20:45 (ou cando recollamos a sala despois da peli) comezará a festa con música do demo para bailar deica pouco antes das 00:00, porque na hora meiga haberá un “conxuro con queimada” para afastar os maos espíritos. Tamén haberá cócteis infernais de 20.45 a 22.15.

E, por se todo isto fose pouco, haberá un Altar de Muertos mexicano e un photocall terrorífico na entrada do Ateneu Roig.

Espectáculo de monicreques

O domingo 2 de outubro, ás 12:00 horas, estamos todas convocadas ao espectáculo de monicreques BARRIGA VERDE ATACA DE NOVO a cargo de TÍTERES ALAKRÁN.

Baseado en marionetas de luva construídas e manipuladas por Borja Insua (monicrequeiro, actor e escultor), trátase dun espectáculo de monicreques de cachaporra tradicional, inspirado nas rutinas que facía Xosé Silvent, na súa famosa barraca, a principios do século XX. Barriga Verde é o monifate popular de Galiza, representando co seu humor a idiosincrasia galega. Títeres Alakrán recupera a súa figura adaptándoa ao mundo contemporáneo para que a nosa tradición siga viva e non morra.

Barriga Verde ataca de novo reinventa os clásicos números da morte, o demo, o militar ou a tourada.

Duración: 45 min.

Público xuvenil e adulto.

O lugar, como decote, será o Ateneu Roig (Torrent d’en Vidalet, 34 de Barcelona).

O prezo, o que queirades (billeteira inversa).

Animádevos que promete!!!

De volta ás aulas

Aulas ACGB
Cartaz cortesía de Miriam Dida

En setembro voltan as aulas da ACGB!

Faremos as clases de pandeireta e baile os xoves no Ateneu Roig a partir das 19:00 horas.

Se estades interesadas é moi importante que enviedes un mail a aulas.acgb@gmail.com, co voso nome e apelidos, indicando a que modalidade queredes asistir e en que nivel.

Mandarémosvos toda a información e o calendario deste trimestre.

As prazas iranse cubrindo por orde estrita de recepción dos correos, así que non vos despistedes.

Animádevos!!!

Os vermús da ACGB

O 21 de novembro, no Ateneu Roig, proxección do documental

Dorothé na vila.

Un filme de Alejandro Gándara e Olaia Tubío. Unha viaxe tras as voces do cancioneiro para os vermús da ACGB.

Prezo: Billeteira inversa.

25 anos con Lois Pereiro

O día 5 de xuño, ás 12:30, farase unha homenaxe presencial a Lois Pereiro, replicada o mesmo día e á mesma hora en diversos puntos de Galiza (e máis alá). Será un acto expansivo de conmemoración do 25 aniversario do pasamento de Lois Pereiro, promovido dende o Ateneo Casino de Monforte.

Desde a ACGB, como punto de encontro da Galiza exterior, convidámosvos a participar na homenaxe lendo algúns textos de Lois Pereiro. Ramón Casanova e Anxo Baranga serán os encargados de coordinar as lecturas. Calquera interesada pode ler os textos.

Este acto terá lugar no Ateneu Roig antes do concerto de Caamaño & Ameixeiras que está programado ás 13 horas do mesmo día e do que tedes información nesta mesma páxina, un chisco máis abaixo.

Caamaño e Ameixeiras

O 5 de xuño, ás 13 horas, no Ateneu Roig, Sabela Caamaño e Antía Ameixeiras presentarán o seu disco “Aire!” dentro da programación dos “Vermús da ACGB“.

Aire!” é o berro das foliadas, desa catarse colectiva. De momento, a causa do Covid, non podemos facer estas fías como se merecen, pero como ouvintes desfrutaremos moitísimo.

Caamaño no acordeón cromático e Ameixeiras no violín, serán as protagonistas do noso vermú, cun repertorio que respira Galiza por mar, terra e aire!!!

IMPORTANTE: para reservas, escribide a comisionactividadesacgb@gmail.com O aforo é limitado.

APORTACIÓN: 7€

O cartaz é un deseño de Miriam Dida (moitísimas grazas <3).

Día das letras galegas 2021

A ACGB celebra o día das letras galegas o 15 de maio na Plaça Joanic de Barcelona.

Este ano está dedicado á creadora, poeta, editora, tradutora e mestra, Xela Arias.

Teremos dúas horas de charlas, contos, maios e música, para celebrar as nosas Letras.

Podedes ver a programación no cartaz: