Coa chegada do outono volven os encontros de Novidades Maruxa, xuntanzas mensuais para facer actividades manuais creativas de diversa tipoloxía e ámbitos, desde a perspectiva do “Feito a man”. O obxectivo principal é o intercambio de saberes e coñecementos mutuos dentro dun contexto galego, fomentando a creatividade, o autoaprendizaxe e a autosuficiencia.
Os encontros realízanse o último sábado de cada mes, a partir das 16:30h no Ateneu Roig (c/Ciudad Real, 25 – Gràcia – Barcelona). Podedes confirmar a vosa asistencia, ou resolver as vosas dúbidas, escribindo a novidades.maruxa@gmail.com
Velaquí o programa deste primeiro trimestre, lembrade que se queredes aproveitar o espazo para facer as vosas propias manualidades, sodes benvidos! É un espazo aberto para nós!
Sábado 27 de setembro (a partir 16:30h): Xuntanza libre para facer as vosas propias creacións, aproveitaremos para poñernos ao día do verán. Se non tedes proxecto, nós traeremos material para que poidades comezar!
Sábado 18 outubro (a partir 16.30h): comeza o frío e imos precisar un bo bálsamo labial de mel natural! Imprescindible confirmar asistencia en novidades.maruxa@gmail.com antes do xoves 15 de outubro, para calcular o material necesario.
Sábado 29 novembro (a partir 16:30h): Sempre ves nas feiras esas bolsas tan estupendas e sinxelas con algún estampado ou frase divina, tan útil para levar os garavanzos que mercas cando saes do traballo, ou para vir ás maruxiñas e levar as agullas e a lá… só tes que traer as teas que queiras, e nos poremos o patrón e a máquina de coser.
ACGB 